El coordinador xeneral d’IX Asturies, Manuel González Orviz, aprovechó güei pa repitir el refugu del so partíu a la incineración n’Asturies, mientres la presentación d’una moción nel Conceyu de Xixón na que, precisamente, apostábase por buscar alternatives a esi modelu de tratamientu de la fracción resto de les borrafes.“Tamos dispuestos a estudiar alternatives que sían vidables tantu técnica como económicamente, pero que ambientalmente sían les más favorables”, afirmó’l máximu responsable d’Izquierda Xunida.

Manuel González Orviz apostó, amás, por abrir un diálogu social, coles mires de buscar consensos na materia. Al respective de la elección de Xixón pa reivindicar la necesidá d’implementar un nuevu modelu basáu nel reciclaxe, la reutilización y l’amenorgamientu d’arramaos, el coordinador xeneral d’IX destacó qu’esi conceyu, al tratase del más pobláu d’Asturies, tien un pesu especial que tamién se ve reflexáu na so participación en Cogersa.

El voceru d’IX en Xixón, Aurelio Martín, xustificó la presentación de la moción, na que se refuga frontalmente la macroincineradora, tantu poles socesives sentencies qu’esbaraten el fallíu plan de resíduos como pola nuevu correlación de fuerces polítiques que, a xuiciu del edil, tien d’aprovechase pa virar los modelos de xestión de borrafes en Xixón y n’Asturies. La propuesta, esplicó Martín, concretase na revisión del plan estratéxicu, previa evaluación de les alternatives esistentes, pa tratar que la fracción resto sía medioambientalmente y económicamente la más apropiada refugando que pueda ser la macroincineración”.

IX pretende tamién abrir un alderique técnicu y científicu, cola aportación del conseyu sectorial de medioambiente.

Pela so parte, Luis Miguel Romero, responsable de Mediu Ambiente d’IX en Xixón y representante del Conceyu de Xixón na xunta de Gobiernu de Cogersa, aportunó en que la incineración tien que refugase ya que, dixo, a los varapalos xudiciales y el refugu social xúnense otros de tipu oxetivu, como les consecuencies que pa un conceyu como’l xixonés supondría una instalación que les sos emisiones, daos los vientos predominantes n’Asturies, terminaríen per afectar de forma especial a l’área oeste del conceyu, una zona especialmente afectada por partícules contaminantes. Pero ye que, amás, señaló Romero, si Xixón refuga’l modelu d’incineración, el proyectu quedaría muertu, abriendo una nueva etapa. “Creo que ye’l sentíu de la proposición y el llamamientu al restu de grupos municipales por que la sofiten porque si’l Plenu mayoritariamente decantar por esta posición, la nueva etapa, de manera material empecipiaríase, independientemente d’otros condicionantes d’ámbitu autonómicu”.

Texto de la iniciativa