por Javier Cubero

Asturias (…) debe ser la primera en el palenque del derecho por la federación; en vano transcurren los años en que gobiernos unitarios la despojan de sus fueros y franquicias, en vano esa centralización trata de borrar su peculiar modo de ser; aún conserva su lengua y sus trajes, sus usos y costumbres, y su espíritu federal se despierta en todos los actos solemnes de su honrosa historia. A principios de este siglo, rotos los débiles lazos con que el unitarismo monárquico constituyó la nacionalidad española, Asturias sintió su personalidad e integró su soberanía, siendo la primera en declarar la guerra al coloso Napoleón I.

Manifiestu de la Xunta del PRDF d’Asturies, 25 de marzu de 1883.

Anque nos estudios académicos de la Hestoria d’Asturies ocupaba un llugar abondu marxinal hasta hai mui pocos años, el Partíu Republicanu Democráticu Federal (PRDF) foi una fuercia política que movilizó y articuló socialmente a una gran parte de los sectores populares del País ente los años 1868 y 1936.

L’ideólogu y principal dirixente del partíu a nivel estatal, hasta’l so fallecimientu en 1901, foi l’intelectual catalán Francisco Pi i Margall, que n’obres como La reacción y la revolución (1854), Las nacionalidades (1877) y Las luchas de nuestros días (1884), teorizaba’l federalismu como una espansión societaria de la llibertá individual (a la cual consagraba como valor central de la so filosofía política) dende abaxo hasta arriba al traviés d’un sistema de pactos progresivos ente los ciudadanos soberanos y les estremaes entidaes territoriales. Colo cual, convirtiéndose nun precursor del derechu d’autodetermín, frente a concepciones simplemente descentralizadores del Estáu-Nación unitariu va considerar a les nacionalidaes hestóriques non como arcaísmos folclóricos sinón como suxetos políticos.

El so compromisu coles tradicionales reivindicaciones populares sobre l’abolición de les quintes (serviciu militar obligatoriu) y de los consumos (impuestos indirectos qu’encarecíen munchos productos básicos) favoreció que’l PRDF yá dende la so fundación se convirtiera nun partíu de mases, adquiriendo una importante implantación ente la pequena burguesía y el proletariáu de la fastera central d’Asturies, especialmente na ciudá de Xixón.

Magar que nun cuestionaba’l capitalismu como mou de producción el PRDF plantegó un ampliu programa de reformes sociales en beneficiu de la clase obrera. Asina a lo llargo del caberu terciu del sieglu XIX, cuando’l movimientu obreru asturianu tovía taba dando los sos primeros pasos, foi’l partíu más a la esquierda del mapa políticu del País. De fechu destacaos activistes anarquistes y socialistes tuvieron como primer militancia la federal.

En 1883 el PRDF d’Asturies realizó una Asamblea en Xixón p’aldericar un proyectu de Constitución asturiana, que redactara’l mélicu Eladio Carreño, quien fora alcalde de la villa na curtia I República Española, col oxetivu de desendolcar y concretar el so proyectu políticu. L’Asamblea tuvo unes diez sesiones ente los díes 29 d’abril y 13 de mayu, y nella foron aprobaes tanto les Bases de Constitución Regional Asturiana como otru documentu de Bases de organización definitiva del partido federal de Asturias. La llexitimidá y la necesidá de la sociedá asturiana pa constituyise n’Estáu soberanu yeren argumentaes en base a una amplia bayura de criterios, que diben dende les tradiciones hestórico-culturales hasta la rexeneración económica y alministrativa. El testu incluyía gran parte de les aspiraciones de los federales asturianos a lo llargo de 92 artículos estructuraos en 18 Títulos, pero solamente les que consideraron oportunu recoyer constitucionalmente mientres qu’otres tendríen de ser oxetu de llexislación nel futuru Estáu.

El Títulu I s’aniciaba afirmando la voluntá del «Estado soberano de Asturias» d’integrase nuna «República Española o Ibérica», comprometiéndose a acatar la so Constitución pero acutándose «todos los derechos que no haya delegado en el poder federal». De siguío s’establez la soberanía popular como fonte de «todos los poderes y todas las funciones públicas», la «república democrática federativa» como forma de gobiernu del Estáu y la capitalidá na ciudá d’Uviéu. Tamién se postula una revisión de la territorialidá esistente col artículu 3º: «Los límites del territorio asturiano son, por ahora, los marcados por la vigente ley (…) hasta que una ley constitucional, después de haber oído a los concejos, consigne la nueva división, corrigiendo los defectos actuales». El Títulu II presenta una declaración de derechos individuales que proclama como «anteriores y superiores a toda legislación, por ser inherentes a la naturaleza humana». El Títulu III define l’autonomía de los conceyos y les característiques de la ciudadanía dientro del Estáu asturianu. L’artículu 23º tien particular interés porque instaura una fiscalidá progresiva y proporcional. Los Títulos IV, V, VI, VII, VIII, IX, X y XI establecen la organización de los poderes llexislativu, executivu y xudicial. El parllamentu del Estáu ye denomináu como Xunta Suprema Asturiana, tando compuestu de dos Cámares: la Diputación Asturiana, cuyos integrantes «serán elegidos por sufragio universal directo de todos los ciudadanos», y el Conseyu Federal, formáu por representantes de los conceyos. Los poderes executivu y xudicial seríen exercíos por una Comisión Executiva Permanente, nomada pola Xunta Suprema Asturiana, y por un Tribunal de Xusticia del Estáu. Los Títulos XII, XIII, XIV y XV aborden respectivamente la estructuración del enseñu, de la fuercia pública, de los impuestos y de la beneficencia. A lo cabero’l Títulu XVI regula’l procedimientu de reforma constitucional al mesmu tiempu que consagra como irreformables los derechos recoyíos nos trés primeros Títulos, el Títulu XVII recueye les disposiciones xenerales y transitories, y el Títulu XVIII trata de les funciones que l’Estáu asturianu delega nel poder federal.

Consulta el número completo